Tekst og foto: Trygve Martinussen

Vegen inn til Wittgensteinhuset i landbrukskulturlandskapet

Ivaretaking av bygg nr. 3 i 2026 - Kvilestova

Ivaretaking av Wittgensteinhuset er primæroppgåva for SWiS. Men me vil òg at fotturen inn til Huset skal vera ei god oppleving. Det er den ikkje dersom samanbrotne hus pregar landskapet.

Til trass for at Stiftinga aldri har hatt meir enn to fysisk arbeidane dugnadsutøvarar, har me - takka vera gode hjelparar - klart å ta hand om 3 nedfallstrua bygningar langs vegen.

Glimt inn i kulturlandskapet slik studentane Lubna og Sabeth skisserte det 30. juli 2018.

Bygg nr. 1: Husmannsløa

Total demontering og attreising. Utført i 2017 med tilskot av SMIL-midlar frå Luster kommune. Bilete under, før og etter.

Bygg nr. 2: Utmarksløa

Demontering av tilbygg, reetablering av gavlvegg, rydding av vegetasjon, taklekkasjeutbetringar, restaurering av dørene, nye plater på den opphøga delen av taket, etablering av internt rom for eige bruk, arrangert syningsplass for informasjon, mezzanin førebudd med golv lagt ut.

Utført i 2019-25 med tilskot frå Luster kommune kulturmidlar og Luster Sparebank. Bilete under, før og etter.

Bygg nr. 3: Kvilestova

Nye vindauger, panelfornying, rydding inne og ute. Utført i 2026 med tilskot frå Luster kommune kulturmidlar og Luster Sparebank

Saman med underteikna er det Vegard Bolstad frå Stiftinga saman med våre trufaste hjelparar Terje Lium og Jan Nyberg som har stått for arbeidet i 2026.

Tone Bay -Wittgensteinseminaret sin mest trufaste deltakar, gjer merksam på «halv-vegs» i 2022. Terje Lium tek ein velfortent pust etter at «nye», minst 100-år gamle vindauger frå Trøndelag er på plass.

Framleis - i 2026 - er me kanskje berre halv-vegs? Ja, oftast er me berre

halv-vegs

Halv-vegs ferdig

Halv-vegs tilfreds

Halvvegs i ferien?

Halv-vegs til Fortun

Halv-vegs på rett kurs

Halv-vegs å stole på

Halv-vegs i livet?

Halv-vegs attende

Halv-vegs bestemt

Halv-vegs tvangsforestilt

Halv-vegs tilrekneleg

Halv-vegs hit - halv-vegs dit

Ja wohl - halv-vegs er her og no.

Kvilestova vart i si tid brukt for kvile og «servering» i høyonna for arbeidsfolka frå Gulbrandsgarden i Skjolden. Maten vart ofte servert av syklande småjenter frå Skjolden, i flg. ei av dei, Anna Marta Bukve, framleis buande i Skjolden. I seinare tid har stova vore brukt som standplass i hjortejakta med øydelagde vindauger som resultat for tilpassing til dette.

Huset har si eiga historie. Den lafta delen av bygget som er panelt, vart i 1927 flytt hit frå vårstøl nr. 2 i Mørkridsdalen, mellom Bratten og Rustadgjerde. Flyttinga skjedde etter at garden hadde vorte delt i to i 1926. Bygget var der brukt som sèl, på vårstøl nr. 2 for Gulbrandsgarden i Skjolden.

Illustrasjonsbilete – frå Fylkesarkivet - av typisk høyonnarbeid frå fyrste halvdel av 1900-talet.

Om krefter og helsa står oss bi, kan det kanskje bli fullføring kommande år med meir rydding, tidsrett innreiing, relevant informasjon mm..

Det gjer alltid godt å koma lengre enn halv-vegs - - -